الثلاثاء، 22 يوليو 2008

رفيق العمر


أغلى شئ في الحياة الصداقة فلا يمكن للإنسان
أن يعيش وحيدا مع نفسه من غير أصدقاء يذهب معهم و يأخذ برأيهم
ويقفون بجانبه في شدته فرحه وحزنه وألمه وجرحه
فلا يمكن أن أتوقع أن أجد إنسان بدون أصدقاء
فلذلك احزن كثيرا اشد الحزن عندما يكون لى صديقة كنت أحبها وأحكى لها كل شيء
واجلس معها أكثر وقتي وتنقلب عليا فجأة بدون أسباب واضحة
وتأخذ صديقة أخرى بدلا منى
ولكن كيف نختار أصدقاؤنا ؟
لن أجيب على هذا السؤال وأرجو من الذي يعلق بإبداء رأيه
وهل الصداقة التي تكون على النت مثل الصداقة العادية
التي تكون في المدرسة أو الجيران أو العمل أو في اى مكان ؟
فالصداقة أهم شيء في حياة الإنسان ولذلك يجب علينا أن يكون الحب بيننا في الله ليس بهدف أو لغرض أو لمصلحة وان تبنى صداقتنا على الإخلاص والحب والأمانة والتسامح والتعاون والمشاركة والحب في الله أولا
فمن الذين يظلهم الله يوم لا ظل إلا ظله رجلان تحابا في الله اجتمعا عليه وتفرقا عليه
فليس حب الأصدقاء بسبب المصالح والمنافع كما يحدث الآن في كل مكان
نادرا عندما أجد أصدقاء يحبون بعضهم بدون أسباب
ولازم اللي يصاحب حد يكون زيه حاجة معروفة

وحدثنا عنها الرسول صلى الله عليه وسلم
فقال (المرء على دين خليله فلينظر أحدكم من يخالل)
ليه لما نحب إنسان ونثق فيه ونقول خلاص لقينا اعز صديق
يطلع بيخونك بعد ما تحكيله كل أسرارك ومشاكلك يكون بيحقد عليك وقدامك سمن على عسل و أول ما تمشى ياااااااااااااااااااااااااااااااااااه على اللى يحصل كلام بقى وحاجات عمرك ما قولتها
ليه الحقد اللي ملى قلوب الناس ده ؟
افضل حاجة ان الإنسان يلاقى حد يحبه ويوده ويسال عنه بس كل ده راح

اعتقد أن الكلام ده كان زمان ولا إيه؟
نفسي الأيام الحلوة ترجع تأنى والصداقة الحلوة ترجع من تانى
لان الصداقة كنز لا يفنى بس شكله فني اليومين دول
كل إنسان بيبقى نفسه يبقى ليه صديق يحكيله عن مشاكله وهمومه
ويعد معاه بس نعمل ايه فى الدنيا دى؟ يالا
انا ما انكرش ان لسة فيه ناس كويسين بس نادرين نجبهم منين دول؟
وخاصة لما يكون الانسان متعود على أصدقاء
وفجاْة كده يبعد عنهم يعنى انا مثلا بعد تسع سنين متعودة على اصدقاء
وحبتهم وعرفت منهم الوحش والحلو
مرة واحدة كده اقدم فى مدرسة ثانوى فى مكان تانى غير اللى هيدخلوا فيه
فى مكان معرفش فيه حد اعمل ايه؟
ولسة هاتعرف على اصدقاء تانيين
مش معقوله ها اقدر أنسى اعز اصدقائى
مش كفاية الإجازة اللي بتفرقنا
ومش معقول انى هاقدر اعمل صداقة جديدة وابعد عن اصدقائى
اتمنى ان الموضوع يعجبكم ان شاء الله

ومتحسوش انكم قاعدين فى خطبة جمعة
و أرجو الرد على سؤالي

هناك 32 تعليقًا:

و القادم....أجمل يقول...

بصي يا قمر
الصداقة أجمل حاجة في الدنيا

الصديق هو اللي يفهم طباعك
و شخصيتك مش اللي يكون شبهك في كل حاجة

يعني تفهميه و يفهمك

أنا بحب النت جدا
و بعتز بالعلاقات و الشخصيات
اللي عرفتها منه

بس خلينا واقعيين
إحنا برضوو حدود تعاملنا
الشاشة و الكي بورد

يباه الصديق اللي انتي اتعاملتي
معاه وجها لوجه
جربتيه في مواقف مختلفه

الصديق مش بنعرف نختاره
الصديق بنحسه

أصدي طبعا في اللي فات
الصديقة
:D

ربنا يوفقك
و معلش طولت عليكي

استحملينا باه

:)

جوجو يقول...

والقادم .... اجمل
السلام عليكم
لا عادى ولا يهمك طولى براحتك وانا بحيكى على صراحتك دى وشكرا على زيارتك للمدونة

غير معرف يقول...

أنا بحبك أووي يا جوجو
ده أحلى موضوع شفته في حياتي
وربنا يخليكي لينا علشان تكتبي مواضيع أحلى وأحلى
وبصراحة ألي يعلق تعليق وحش على الموضوع ده يبقى ......
وربنا يوفقك يا رب .
samar

جوجو يقول...

سمر
شكرا اوى ليكى انتى بتقولى كده عشان انتى اعز صحبة ليه والله ربنا يخليكى ليه يارب ومش عارفة اققولك ايه والله

ahmdnour يقول...

موضوع فوق الرائع احيكى عليه واتمنالك التوفيق فى كل شئ وفى حياتك والى الامام دائما ربنا يوفقك يارب

جوجو يقول...

السلام عليكم
شكرا اوى يا احمد على زيارتك للمدونة

مجلة الأم الصغيرة يقول...

What is a friend? A single soul dwelling in two bodies.
~ Aristotle

مبرووك على المدونة .. استمري و إن شاء الله سأزورك دائما

جوجو يقول...

قطرات من شواطىء الحياة
الله يبارك فيك وشكرا على تعليقك وزيارتك للمدونة

عـــفـــراء يقول...

السلام عليكم
اية دة ياجوجو ازاى دة
مع ان انا المفروض اكون من اوائل التعليقات
بس معلش حبيبتى انتى عارفة الظروف اللى انا فيها
عموما مبروك وملحوقة
انما اية العسل دة يابت انتى طلعتى استاذة على كدة حلوين البوستين اوى
على ومش مهم تكون خطبة جمعة دة حتى مش اى حد يخطب
ربنا يعينك ويقويكى ياقمرايا
اما الصداقة طعم الحياة باكملها
فهى كنز من كنوز الدنيا من عصر علية امتلكه
تحياتى ليكى يااستاذة....

جوجو يقول...

عفراء
وعليكم السلام
انا الحمدلله كويسة انتى عاملة ايه الله يبارك فيكى وشكرا على زيارتك للمدونة

zOzO يقول...

بصي يا جوجو
انتي اخت الغاليه رحيل
وانا بموت فيها
بجد بحبها اوي


المهم ساره انا اعرفها من ع النت ورغم اني مش اعرفها اوي بس بجد بحبها
اللي عايزه اقوله
انه بيبان من الكلام الشخص اللي قدامك حلو او لا


والصداقه دي احلي حاجه ف الدنيا بجد
مفيش احلي من كده
لما تكوني مضايقه تلاقي حد منهم
بس قليل لما تلاقي صديقه بجد
بس اكيد في برده


ربنا يوفقك يارب
وتلاقي أصدقاء كتيررررررررره

جوجو يقول...

السلام عليكم
اهلا بيكى يا زوزو فى مدونتى وشكرا اوى على تعليقك

Hayam يقول...

الصداقة موجودة فأي مكان وفأي زمان
محتاجة بس الواحد يبدأ بنفسه وميبصش حواليه ويقول ماكل الدنيا كده ابقى احافظ على وفائي للصداقة ليه ماهي ماشية كده

يعني يركز فنفسه وفي لي حواليه وحيلاقي ان شاء الله الناس بتعامله بالمثل

الصداقة احلا حاجة عشان الواحد يكتشف نفسه .. دي مراية الانسان

وربنا يدومها علينا

احنى هنا كلنا صحاب
ومش حتبقي لوحدك ياقمر

جوجو يقول...

السلام عليكم
ازيك يا يوما عاملة ايه ميرسى على تعليقك

oRiGiNaL HeArT يقول...

ولكن كيف نختار أصدقائنا ؟

بحس ان الانسان مش بيختار صديقه مع ان المفروض اننا نختار اصدقائنا بس مرة فكرت فى الموضوع لاقيت ان الصديق دة انسان بنرتبط بيه فى حياتنا واحنا ماشيين وبنتعود عليه وبنقول عليه صديق وفى الاخر ياما يطلع انسان كويس ويستاهل كلمة صداقة ودة قليل اوى
وياما يطلع حاجات كتير غير اللى احنا كنا فاكرينها ودة كتير اوى فى الايام دى
بنلاقى بعد وقت طويل ان الانسان اللى فاكرينه اعز صديق بيطلع ولا حاجة وبيطلع ابعد ما يكون عن معنى الصداقة


بجد مواضيعك مميزة جدا احييكى
:)

جوجو يقول...

original heart
انا متفقة معاكى جدا فى كل كلامك يمكن انتى الوحيدة اللى متفقة معاها وانا بشكرك جدا على زيارتك للمدونة

RASHA يقول...

جوجو مدونتك متميزة وفعلا امى ثم امى احييك على اختيارك وعموما الصداقة اصبحت عملة نادرة فى الزمن ده خصوصا لما تبحثى عن انتيم ليكى

جوجو يقول...

shasha
اهلا بيكى فى مدونتى وشكرا اوى على تعليقك وعلى ذوقك للمدونة

Unknown يقول...

الأصدقاء واختيارهم اختلفنا فيه أشد الاختلاف فقد تضطرك الظروف لأتخاذ صديق لم يخضع لإختارك الشخصلى انما كما قلت وضعته الظروف كما أننا نريد أصدقاء لا يخطئون نريد أشخاصا مثاليه وبالطبع لا يوجد وهل نخضع اختيار الأصدقاء لكى يكونوا متشابهين بنا فى كل شئ لا لن يكونوا مثاليين بالطبع ففينا صفات لا نتمنى أن نرى أنفسنا عليها فما بالنا بنا وبأصدقاءنا
إذن فلنختار أصدقاءنا لكى يعينونا على الحياه ويساعدونا عليها كلوفق اختياره الشخصى

دمتى بخير

مصطفى

جوجو يقول...

egyboy
السلام عليكم
اهلا بيك فى المدونة وشكرا على تعليقك

""""" يقول...

بصى حبيبتى الناس اصناف
صعب تختارى حد مش شبهك ( فى الحاجات الاساسيه المعروفه ) وتكملوا مع بعض

الصاحب ساحب ذى ما بيقولوا
اختارى صح وبرضه حطى احتمال للنهايه
عشان متتصدميش

عموما
لو قدرنا نميز ان فعلا مفيش حد كويس بنسبة 100 % فاكيد هنقدر نتعامل مع النسبه التانيه بحكمه

يعنى اللى بيوصل الناس لمفترق الطرق ايه ؟؟
يعنى انا شايفه انه لا بد من الشده واللين فى نفس الوقت
شويه زعلانه وبعاتب وشويه بسامح وانسى
وفى جميع الحالات لازم ننسى
عشان نقدر نكمل مع بعض لازم نسى او على الاقل نتناسى اخطاء بعض

بالنسبه لصداقة النت
فانا حاليا بعتبرهم اقرب ليا من اصداقائى برا النت
يمكن لانى بقضى معاهم وقت اطول
ومجال الكلام مفتوح بينا بشكل اوسع

لما حد بيغيب عن النت التانى بيسال عنه
دخلوا حياتى بعمق
وبدات احس وجودهم حواليا بشكل مادى

ربنا يوفقك يا حبيبتى دايما فى اختياراتك

أحمد هشام يقول...

مقال جميل ...
و لكن الواحد لما بيكون في بداية حياته بيكون دايما مش متخيل انه ممكن يبعد عن أصحابه اللي اتعود انه يقضي معظم وقته معاهم ... ولكن مع مرور السنوات الواحد بيكتشف ان هي دي سنة الحياة .. دوام الحال من المحال ...
طبيعة الحياة بتفرض علينا اننا دايما نفترق عن اللي بنحبهم ...
و هيبقي أمر عادي جدا و معتاد إننا نقابل ناس ونتعلق بيهم .. وبعد كده نبعد عنهم ...
و لكن ده لا ينفي أبدا إن هناك بعض الأصدقاء وهم من نسميسهم أصدقاء العمر تظل علاقتنا بهم مستمرة ... و لا يؤثر عليها البعد .. و يا رب كل واحد يلاقي صديق عمر مخلص ...

جوجو يقول...

السلام عليكم
اهلا بيكى يا امل فى مدونتى وشكرا على تعليقك الجميل ده

Unknown يقول...

اسجل اول مرور
الصديق الحقيقى هو الذى يقول لى عيوبى
تحياتى

جوجو يقول...

السلام عليكم
اهلا بيك يا احمد فى مدونتى وهو فعلا دى سنه الاحياة وميرسى اوى على تعليقك

جوجو يقول...

medus
السلام عليكم
اهلا بيك فى المدونة وميرسى على تعليقك
دومت بخير

رحــــيـل يقول...

مش عارفه ليه ياجوجو
دايما بحب اعلق فى نهايه البوست جايز غلاسه بقى وانى اصلا بكون قراه الموضوع من قبل ماينزل
على العموم انا ليه اصحاب كتير من على النت وبحبهم كده هى بس بتفرق فى العشره والمواقف اللى بتكون بين اصحابك اللى انتى عايشه معاهم

وبعدين دايما بتفضل ذكرى تجمعكم حتى لو بعدتكم الايام

مجلة الأم الصغيرة يقول...

جوجو إزيك مررتلك تاج كراسة الواجب تعالى زورى مدونتى عشان تعرفى شروطه وتردى عليه عندك هنا

جوجو يقول...

رحيل
انتى مش عارفة ليه بتعلقى فى اخر البوست لاء اطمنى هى فعلا غلاااااااسة المهم شكرا على غلاستك وتعليقك سلااااااااااااام ياقمر

مصر يا موكوسه .....يا مزارع الكوسه يقول...

عارفه ان الموضوع ده فكرنى بحاجه غريبه اوى حصلتلى
مره صاحبت واحده وبقت صحبتى جدااااااااااااااااااااااااا
وفى الاخر اكتشفت انها قريبتى من بعيد
طحياطى

جوجو يقول...

مدرسة الفشله بنات
ازيك اهلا بيكى فى المدونة وشكرااا اوى على تعليقك

rovy يقول...

السلام عليكم

الصداقه الحقيقية كنز لا يفنى مدى الحياه بل و تظل الصحبة الطيبه الى ما بعد الحياه ليكون لقاء اخر فى الجنه ان شاء الرحمن ..
المهم حقا ان نحسن اختيار اصدقائنا وان نتعلم كيف و متى نسامح لاننا بشر ومن منا لا يخطىء فلا يجب ان نتوقع من الصديق دائما المثاليه و لكنه يجب ان يكون مخلص لنا و يقف بجانبنا وقت الحاجه ..و يعلم كل طرف واجبات الصداقه و يتمسك بها حتى تدوم ..

اتمنى ان يرزقكى الرحمن باصدقاء حقيقيون يعرفون معنى الصداقه و يقدرونها و ان تجدى معهم الراحه والامان
صحيح كل حاجه دلوقت اصبحت عمله نادره لكنها ما زالت موجوده كما قال رسولنا الكريم المصطفى عليه افضل الصلاه والسلام .. الخير فى امتى الى يوم القيامه .. صدق الحبيب المصطفى
يعنى لازم نكون متأكدين ان الخير فينا وموجود بينا و عمره ما حينتهى ..

موضوع متميز .. واسلوب جميل

دمتى فى حفظ الله

تحياتى